O encontro estará dedicado a un tema fundamental para o benestar persoal e colectivo: a educación emocional. Para iso contaremos coa presenza de Alfonso Cuadros Riobó, psicólogo xeral sanitario, doutorado en Psicoloxía Social e experto en neuropsicoloxía.
Ao longo da súa traxectoria profesional traballou en ámbitos moi diversos —desde a saúde mental grave ata a mocidade, as migracións ou o deterioro cognitivo— tanto en institucións públicas como en organizacións sociais. Ademais, desenvolveu tarefas docentes e de investigación, e na actualidade é colaborador de Cruz Vermella Pontevedra.
Na súa exposición, Alfonso Cuadros abordará a educación emocional (EE) como unha ferramenta clave para aprender a xestionar e coidar as emocións, independentemente da idade, do xénero ou do contexto sociocultural de cada persoa.
A charla porá o acento no carácter preventivo e sanador da Educación Emocional no desenvolvemento humano, facendo especial fincapé nos desafíos actuais vinculados co xénero, as relacións entre iguais e as diversas formas de discriminación.
Non será unha sesión unicamente expositiva: procurarase a implicación e participación activa das persoas asistentes, favorecendo un espazo de diálogo e aprendizaxe compartida.
